رواية حب من طرف ثالث الفصل الاول حتى الفصل التاسع بقلم عادل عبدالله حصريه وجديده
الام : يلا يا بت انتي وهي اصحوا بقه .احنا ورانا حاجات كتير النهارده .بت يا سلوي قومي علشان ورانا شغل كتير .
سلوي : حاضر يا ماما قايمة اهو .
الام : قومي يا ناردين يا حبيبتي يلا علشان تلحقي تروحي الكوافير .يلا يا عروسة .اصحي يا قلب ماما .
ناردين : حاضر ياماما قايمة اهو .
قامت ناردين من النوم وخرجت من غرفتها فوجدت مامتها .تأخذها الام في حضنها وتقبلها : الف مبروك يا روح قلبي .
ناردين: ميرسي يا ماما .انا هلبس ونازلة اروح الكوافير . حطيلي الموبايل علي الشاحن .
الام : خدي يا يا سلوي موبايل ناردين حطيه علي الشاحن .وتعالي علي المطبخ علشان ورانا شغل كتير .
اخدت موبايل اختي ناردين وحطيته علي الشاحن وروحت المطبخ لماما .
: ماما ..هو انا هروح الكوافير امتي ؟
الام : احنا ورانا شغل كتير .متنسيش ان عماد خطيب اختك هييجي هو واهله عندنا علشان هنعمل الخطوبة هنا في البيت .يعني لازم نجهزلهم العشا ومتطلبات الضيافة علشان نرفع راس اختك قدامه هو واهله .
: ماشي ياماما ما انا هعمل معاكي اهو .لكن انا بسألك هروح الكوافير امتي ؟
الام ؛لما نخلص ابقي روحي .وبعدين انتي العروسة ولا اختك ؟ حاجه غريية اويتنضولو مروحتيش الكوافير ايه اللي هيحصل ؟ ابقي البسي وزوقي نفسك هنا .
دخلت المطبخ وبقيت بساعد ماما في عمل الاكل .ولكن قعدت افكر بيني وبين نفسي ....
(صحيح النهاردة خطوبة ناردين اختي والمفروض اني انا اللي اساعد ماما في كل حاجة ولكن انا كمان من حقي اني اروح الكوافير واتزوق وابقي حلوة .ولا يعني لازم اكون معفنه علشان انا مش العروسة !!! وبعدين صحيح انا وناردين اخوات تؤام لكن مش متماثل كل واحدة فينا شكل غير التانية وطبع غير التانية .و ماما بتفرق بينا في كل حاجة ومش عارفه السبب يمكن علشان ناردين دمها خفيف عني وبتحب الهزار والضحك .علطول بحس انها بتحب ناردين وانا لا .لكن انا دايما بكدب احساسي ده .يمكن اكون غلطانة !)
انا وماما قعدنا من قبل الظهر في المطبخ لحد بعد العصر بكتير .
واول ما خلصنا عمل الاكل .ودخلت علشان اخد شاور .لقيت ماما بتقولي : انتي رايحه فين ؟
: رايحة اخد شاور يا ماما .انتي عاوزاني في حاجة ؟
: ايوه طبعا .مش لسه هنروق ونرتب البيت .ولا عاوزة الضيوف ييجوا يلاقونا عايشين في زريبة زي البهايم ؟
: طيب بالراحة يا ماما .انتي عصبية كدة ليه؟
: علشان انتي مش مهتمة بحاجة الا نفسك .
سكت ومش رديت علي ماما .
و رجعت تاني ورتبت ونضفت البيت معاها وقبل ما نخلص لقيت ماما سابتني ودخلت هي اخدت شاور ولبست ووقفت قدام المرايا !!
علطول انا بحس ان ماما بتعاملني وحش غير اخواتي ناردين وايمن .لدرجة اني احيانا بحس انها قاصدة تحسسني بكده علشان تزعلني .
حتي لما رجع ايمن من الشارع دخل غرفته يلبس ومساعدناش في اي حاجه في ترتيب البيت .
ايمن اخويا الصغير ده اخر العنقود واصغر مني انا وناردين باربع سنين .يعني عنده حوالي ١٧ سنه .
طول النهار ايمن بره البيت وماما مش بتكلمه علشان ده دلوعة ماما واخر العنقود وكمان ماما بتقول انه ملحقش يحس بحنان بابا لان بابا الله يرحمه مات وكان ايمن لسه صغير اوي عننا انا واختي .
وقبل مجئ العريس واهله لحقت بالعافية اجهز نفسي والبس واعمل ميك اب .
جي عماد عريس ناردين وكان معاه عمه وعمته بس .
ماما لما شافتهم استغربت بشده لانها كانت فاكره انه هييجي ومعاه ضيوف كتير من اهله .
ماما وخالي ومرات خالي وخالتي وزوجها واولادهم استقبلوا العريس وعمه وعمته وقعدوا معاهم .
انا في بالي قلت الحمد لله انهم مش كتير علشان اقدر اضايفهم كويس .
وفعلا تمت الخطوبة ولبس ناردين الشبكة .وقدرت اضايفهم كويس .
الليلة كانت ظريفة الي حد ما وعماد خطيب اختي انسان محترم اوي ومؤدب وخجول واخلاقه ممتازة ودي اكتر مميزاته .
ناردين كانت طول ما عماد واهله موجودين كانت بتضحك وتهزر وكانت سعادتها واضحة اوي عليها .
بعد ما خلصت الخطوبة ومشي عماد واهله .
.ماما وخالي ومرات خالي نادوا علي ناردين وطلبوا منها انها تقعد .
خالي : انتي يا ناردين مش حاسة انك اتسرعتي في موافقتك علي عماد ؟
ناردين : ليه بتقول كده يا خالو ؟
خالي : يا حبيبتي الولد مقطوع من شجرة ولا اب ولا ام ولا اخوات وقرايبه دول شكلهم عرة اوي .ومفيش حد هيساعده والمشوار معاه طويل اوي ومتعب .هتستحملي التعب ده ؟
ناردين : لكن انا بحبه يا خالو وهو بيحبني .
خالي: يا حبيبتي الحب مش كل حاجه .ومسير الحب الفقر والاحتياج يموته .
انا هنا معجبنيش كلام خالي وقاطعت كلامه : يا خالو مادام بيحبوا بعض هيساعدوا بعض لحد ما يبنوا مستقبلهم سوا واكيد الحب بينهم هيخليهم سعدا ويتحملوا التعب لحد ما يرتاحوا .وخصوصا انه شاب كويس وابن حلال .وعمر ما الفقر كان عيب .ومتنساش اننا احنا كمان يدوب مستورين بستر ربنا .
خالي : انتي بتكلميني كده ليه يا بنت !! انتي نسيتي اني خالك وفي مكان ابوكي !!
: يا خالو انا بقول رايي .وانا بحترمك طبعا ولكن انا مبقتش صغيرة .وناردين اختي ويهمني مصلحتها .
خالي ؛ وهو انتي لما تكبري هتكبري علي خالك يا سلوي ؟ !!!! وهتعرفي مصلحة اختك اكتر مني !!!!!
: لا يا خالو .لكن انا قصدي .....
خالي : اسكتي يا بنت وقومي ادخلي جوه ومتكلمنيش تاني .
: يا خالو طيب اسمعني ......
خالي : انا قلت ادخلي جوه .
قومت ودخلت وقعدت ابكي لوحدي .هما علطول كده ماما وخالي بيعاملوني وحش من ساعة لما بابا مات .
بعد ما خالي مشي هو ومراته دخلت ناردين ولقتني ببكي .
: بقه كده يا سلوي تبكي يوم خطوبتي !!
: انتي شفتي ماما وخالي كلموني ازاي!! هو مش انا بردو اختك ويهمني مصلحتك والمفروض اقول رايي.!!
: يا سلوي انتي عارفه خالو وتحكماته متاخديش في بالك .وبعدين هما يقولوا اللي هما عاوزينه وانا هعمل اللي انا عاوزاه .
: انتي بتحبي عماد؟
: اوي اوي يا سلوي .
الحلقة التانية
بعد ما خالي مشي هو ومراته دخلت ناردين ولقتني ببكي .
: بقه كده يا سلوي تبكي يوم خطوبتي !!
: انتي شفتي ماما وخالي كلموني ازاي!! هو مش انا بردو اختك ويهمني مصلحتك والمفروض اقول رايي.!!
ناردين : يا سلوي انتي عارفه خالو وتحكماته متاخديش في بالك .وبعدين هما يقولوا اللي هما عاوزينه وانا هعمل اللي انا عاوزاه .
: انتي بتحبي عماد؟
ناردين : اوي اوي يا سلوي .
: ربنا يسعدكم يارب .هو باين عليه ابن حلال ويستاهلك .
ناردين : انا كمان بحبه ومش هسيبه .
: اللي نفسي افهم سببه ايه (ليه ماما وخالو بقوا يعاملوني وحش ؟).
ناردين : لا يا سلوي ده بيتهيألك بس هو بس خالي طبعه شديد شوية .. .بس انتي يا بت ماخدتيش بالك من احمد ابن خالك ؟
: .ماله ؟
ناردين : كان مركز معاكي اوي .علفكرة ده بيحبك بجد .
: انا عارفه وقلتلك قبل كده .لكن انا مش حاسه اني بحبه .هو ابن خالي وبس .زي اخويا يعني .
ناردين : انتي حره بقه .انا قلتلك كتير ده شاب كويس ومستقبله كويس .
: انا مقلتش حاجه .هو فعلا كويس لكن مش ده اللي في خيالي .
: نفسي اعرف اللي في خيالك ده شكله ايه ؟
: مش هقولك .ههههه .وضحكنا انا وهي ونمنا .
وبعد الخطوبة بكام يوم راحت ناردين جامعتها . ناردين كانت في كلية حقوق وانا في كلية اداب .وكلياتنا جنب بعض .
خلصت محاضراتي وبعدها روحت عند ناردين كليتها لقيتها قاعدة مع اصحابها بتفرجهم علي صور الخطوبة وكانوا قاعدين بيضحكوا وفرحانين اوي .
بعد شوية خرجنا كلنا من الجامعة .واحنا علي الباب شفنا ياسين خارج بعربيته من الجامعة .
(ياسين ده ابوه راجل اعمال كبير وعنده بدل العربية خمسة وكلهم موديل السنة والفلوس معاه ملهلش حساب ).
ياسين بص علينا وهو خارج واول ما شاف ناردين وقف بالعربية ونادا عليها .
راحت ناردين كلمت ياسين وبعدها نادت عليا .
نادرين : يلا يا سلوي اركبي معايا ؟
: نركب فين يا بنتي ؟
نادرين : ياسين هيوصلنا .
: لا طبعا .مينفعش .
ناردين : يابنتي يلا بقه .هو ايه اللي مينفعش !! دي عربيته حلوة اوي واهي توصيلة مريحة و ببلاش بدل زحمة المواصلات .
: يا بنتي عيب نركب معاه .وكده انتي هتديله فرصة ياخد علينا .وكمان اصحابنا هيزعلوا اننا سبناهم .
ناردين : اخلصي يا سلوي هتركبي ولا اركب انا معاه لوحدي .يلا بقه علشان كده شكلنا وحش اوي .
: والله انتي الللي هتخلي شكلنا وحش .
واضطريت اني اركب معاها علشان متركبش هي معاه لوحدها .
قعدت ناردين في العربية جنب ياسين قدام وانا قعدت ورا .
العربية فاخمة اوي ولكني مكنتش حاسة اني مستريحة .
كنت حاسة ان ياسين في غرض عنده من ورا توصلنا ده .
كنت قاعدة في العربية وبحاول اركز مع ياسين وناردين علشان احاول افهم هو عاوز ايه .
ياسين طول الوقت كان بيضحك مع ناردين وكل شوية يحاول يشركني معاهم في الكلام ويبصلي في المرايا .
الظاهر ان محاولتي فهم الواد ده عاوز ايه فشلت .
مش عارفه اذا كان غرضه حركة شهامه وانه يوصلنا عادي وبس لمجرد انه صاحب ناردين في الكلية ؟
ولا عاوز يقرب من ناردين لغرض تاني ؟ خصوصا انها النهاردة جاية الكلية وهي متزينه اخر حاجه لبس وميك اب لدرجة الكلية كلها كانت بتبص عليها .
ولا عاوز يقرب مني انا خصوصا انه اكتر من مرة لما كان يشوفني مع ناردين كنت بشوف في عنيه نظرات اعجاب .
وبعد تفكير مقدرتش اوصل لنتيجة .
المهم نزلنا من العربيه بعيد عن شارعنا شوية .واتمشينا لحد ما وصلنا البيت .
:ازاي تخلينا نركب مع اللي اسمه ياسين ده ؟
:تضحك ناردين : وفيها ايه يا سلوي ! طب بذمتك عمرك حلمتي تركبي عربية زي دي ؟
: ومش عاوزه يا ستي اركبها .مدام شاكة في الغرض .وبعدين تعالي بقه يا هانم قوليلي انتي بتهزري معاه كده ازاي ؟
: عادي وفيها ايه. مش احنا اصحاب .
: ولو عماد خطيبك شايفك وانتي بتهزري معاه كده ولا لو عرف انك ركبتي معاه هيبقي عادي بردو !!
:ومين بس هيقول لعماد ولا هو هيشوفني فين !
: يعني هو مدام مش شايفك يبقي تعملي اللي انتي عايزاه حتي لو حاجه تزعله ؟ منطق غريب !!
ناردين بتهكم : غريب ازاي يا ست هانم . علميني .منكم تستفيد .
: والنبي بس بلاش تريقه .المفروض ما دام بتحبي خطيبك تحترميه سواء موجود وعارف او مش موجود ومش عارف .
وصلنا للبيت انا وناردين .بعد ما دخلنا البيت ناردين مسكت الفون وكلمت خطيبها وقعدت تتكلم معاه كتير .
ماما نادتني وقالتلي تعالي علشان ننضف ونرتب البيت .
اخدت وقت طويل في ترتيب البيت ولكني حسيت بضيق لان ماما دايما بتخلي شغل البيت عليا انا لوحدي .وكانت ناردين هي اللي بتنزل تشتري طلبات البيت من الشارع .
بعد ما خلصت شغل البيت لقيت ماما بتطلب مني اني انزل اشتري الطلبات من الشارع .
حسيت بضيق اكتر وقلتلها : انا تعبت ياماما و عاوزه اقعد استريح شوية واذاكر .خلي ناردين تنزل تشتري الطلبات .
الام : اختك بتكلم خطيبها دلوقتي .وبعدين لما اقولك حاجه تقولي حاضر من غير كلام كتير .
: انتي بتكلميني كده ليه يا ماما !! يعني انا اعمل كل حاجه وهي قاعدة تتدلع مع خطيبها في الموبايل .
الام : انتي كده هتزعليني منك .متخلنيش ازعل منك وانا زعلي وحش .
اخدت من ماما الفلوس وقلت : والله كده حرام .
سمعتني ماما جريت عليا وقالتلي : انتي بتقولي ايه يا بنت انتي ؟ حرام عليا !! بقه كده !! دي اخرتها !! طيب امشي من قدامي خلينا صابرة وساكته .
نزلت اشتريت طلبات البيت ورجعت لقيت ناردين لسه بتتكلم في الموبايل .
قعدت زعلانه وزهقانه ومليش نفس اذاكر .
شوية ولقيت احمد ابن خالي بيتصل علي موبايلي .( هو كتير بيتصل بيا وانا مش برد عليه الا قليل اوي ولما برد عليه بختصر في الكلام ) .
فكرت ارد عليه ولا لا .انا حاسة اني زهقانه وناردين مش فاضية اتكلم معاها .
رديت علي احمد .
الحلقة الثالثة
شوية ولقيت احمد ابن خالي بيتصل علي موبايلي .( هو كتير بيتصل بيا وانا مش برد عليه الا قليل اوي ولما برد عليه بختصر في الكلام ) .
فكرت ارد عليه ولا لا .انا حاسة اني زهقانه وناردين مش فاضية اتكلم معاها .
رديت علي احمد ..
: الو.
: ازيك يا سلوي عاملة ايه ؟
: تمام الحمد لله وانت عامل ايه ؟
:محتاج اتكلم معاكي كتير .
: اتكلم انا سمعاك .
: في كلام كتير عاوز اقولهولك مش عارف اذا كنتي عارفة احساسي ولا لا.
: بالنسبة لاية؟
:بالنسبة ليكي ؟
: مش فاهمه .
: لا انتي فاهمه كويس .
سكت شوية : لا مش فاهمه .
: يعني انتي مش عارفة اني معجب بيكي من زمان ؟!!!
: معجب بيا انا !!
: ايوه وبحبك كمان .
: بتحبني انا !! انت فاجأتني .
: لا مش فاجأتك .انتي عارفه من زمان .
: لا مكنتش عارفة .
: طيب المهم دلوقتي .انتي عرفتي وعاوز اعرف ردك .
: ردي علي ايه ؟
: يعني بتحبيني ولا لا؟
: انا مش هنكر انك انسان كويس جدا واي واحدة في الدنيا تتمناك .لكن انا مبفكرش في الارتباط دلوقتي .
: انتي خلاص في اخر سنة في الجامعة .نتخطب دلوقتي والجواز بعد سنة او اكتر لو تحبي .
: لكن انا لسه عاوزه احضر دراسات عليا بعد الجامعة .يعني الارتباط دلوقتي صعب .
: طيب بالنسبة ليا انا .انتي بتبادليني نفس الاحساس ولا لا ؟
: فكرة الحب والجواز نفسها بعيدة عن تفكيري .انما انت متترفضش يعني اي واحدة في الدنيا تتمناك .
: ميهمنيش اي حد في الدنيا الا انتي .المهم عندي انتي .
: ما انا قلتلك فكرة الحب والجواز بعيدة عن تفكيري دلوقتي .
: طيب يعني بعد ما تتخرجي من الجامعة ممكن تفكري ؟
: لما اتخرج الاول ابقي وقتها افكر هعمل ايه .
خلصت المكالمة مع احمد ابن خالي .وكانت ناردين اختي خلصت مكالمتها مع خطيبها عماد .
ناردين : مين اللي كان بيكلمك ؟
: احمد ابن خالي .
: كان عايز ايه ؟
: بيقولي انه بيحبني وعاوز يتقدملي ويخطبني .
: يا بنتي بلاش تضيعيه من ايدك .ده لقطة وبيحبك .
: معرفش يا ناردين مش حاساه .مش حاسه من ناحيته باي حاجه .
: وقلتيله كده ؟!!!
: لا .قلتله اني مش بفكر في الارتباط دلوقتي علشان لسه عاوزه اكمل دراسات عليا .
: يعني هو عرف كده انك مش عاوزه ترتبطي بيه ؟
: مش بالظبط .انا فهمته اني مش رفضاه هو شخصيا .انا رافضه الفكرة نفسها .وبعدين سيبك من موضوع احمد .انا شايفاكي بتحبي عماد خطيبك ولا انا فاهمة غلط ؟
: لا مش فاهمه غلط ولا حاجه انا فعلا بحبه .
: اومال ايه حكاية ياسين ده بقه ؟
: ياسين ده صاحبي في الجامعة مش اكتر وبعدين ده يعرف نص بنات الجامعة ومش هيبصلي انا لان وضعه المادي حاجة تانية خالص غيرنا .
: طيب خلي بالك يا ناردين علشان انا مش مرتحاله .
؛ لا متقلقيش من ناحيته .
تاني يوم خرجت من الكلية ورحت اعدي علي ناردين علشان نروح البيت مع بعض لقيتها مشيت .
اتصلت بيها قالتلي انها بتجيب حاجه من بره الجامعة وراجعة تاني .وقالتلي ان انتظرها نص ساعة .
استنتها لحد ما رجعت ولما سألتها كانت فين قالتلي انها كانت بتفطر مع ياسين .
طبعا انا زعلت جدا منها وقلتلها ازاي تخرج مع ياسين بره الجامعه وتفطر معاه بره وهي مخطوبة .
حاولت ناردين تبرير اللي عملته ولكني مش اقتنعت بكلامها وحذرتها انها تعمل كده تاني .
بعدها لقيت ياسين جاي بعربيته ونادي عليا انا وناردين علشان نركب معاه ويوصلنا .
رفضت اركب معاه وقلت لناردين اننا منركبش معاه .لكن ناردين صممت انها تركب معاه .
مقدرتش اسيبها تركب معاه لوحدها .وركبت معاهم .
ياسين لاحظ اني متضايقة من ركوبنا معاه .حاول يهزر معايا كتير واداني شيكولاته انا وناردين .ورغم اني مش رضيت اخد الشيكولاته ولكن ناردين اخدتها .
بعد ما روحنا البيت دخلت انا وناردين غرفتنا وقلتلها انها لو كررت اللي بتعمله ده تاني هقول لماما .
يوم الجمعة جي عماد خطيب ناردين اتغدا معانا .لكن ماما قابلته بمقابله باردة .
بعد ما قعدت ناردين مع عماد شوية يتكلموا .ماما قعدت معاهم وسألت عماد عن اهله وانها متعرفش حد منهم الا عمه وعمته وانها عاوزه تزورهم .وعاوزه تتعرف علي باقي اهله .
لاحظت ان عماد وشه اتغير ولكنه حاول يداري ده وقال لماما ان والده ووالدته ماتوا في حادثة وهو لسه صغير وان اللي رباه عمته واللي كان بيصرف عليه عمه .
وعلشان كده هو اعتبرهم ابوه وامه وهما اغلي حاجه عنده وانه تقريبا ميعرفش حد من باقي اهله الا قليل جدا وملوش اختلاط بيهم .
انا حسيت من عماد ان فيه حاجه هو بيخبيها عننا .ولكني من جوايا شايفه وحاسه ان عماد انسان كويس ولكن في وراه سر .
بعد ما مشي عماد ماما قعدت تتكلم مع ناردين وقالتلها كلام كتير .
بعدها ناردين بدأت تتغير شوية مع عماد خطيبها ومبقتش ترد عليه علطول .
في نفس الوقت ده بدا ياسين ياخد وقت كبير من ناردين وبقيت ناردين بتكلمه كتير وواحده واحده ناردين بقيت تخرج معاه لوحدها وبقيت انا بروح البيت لوحدي .
بعد ما اتكرر ده اكتر من مرة وهددتها اكتر من مرة اضطريت اقول لماما علي موضوع ياسين .
الحلقة الرابعة
في نفس الوقت ده بدا ياسين ياخد وقت كبير من ناردين وبقيت ناردين بتكلمه كتير وواحده واحده ناردين بقيت تخرج معاه لوحدها وبقيت انا برجع من الكلية لوحدي .
بعد ما اتكرر ده اكتر من مرة وهددتها اكتر من مرة اضطريت اقول لماما علي موضوع ياسين .
ماما تظاهرت قدامي انها غضبت من ناردين ولكني بعدها لقيتها قاعدة معاها وبتكلمها عنه .وبتسالها عنه .
اللي فهمته من كلام ماما انها عاوزه ناردين توقع ياسين في حبها ولو ده حصل تسيب عماد وترتبط بياسين .
اتكلمت انا مع ناردين وسالتها : ناردين انتي قلتيلي قبل كده انك بتحبي عماد .ازاي عاوزه تسبيه علشان ياسين ؟!!
ناردين : يا حبيبتي مين قالك اني عاوزه اسيب عماد ؟ وبعدين ياسين ده حلم .احلمه وبس انما ارتباط ده صعب جدا .
: ليه صعب ؟
: لان ياسين اهله مستحيل يقبلوا انهم يناسبوا حد اقل منهم .
: اومال انتي عاوزه منه ايه ؟
: مفيش اكتر من اننا نفطر مع بعض .توصيلة بعربيته .هدية حلوة .خروجه حلوة .
: اومال ايه الكلام اللي دار بينك وبين ماما ده ؟
: سيبك منها .انا بس براضيها في الكلام .انما اللي في دماغي في دماغي .
: يعني هتستمري مع عماد ؟
: ايوه طبعا .
طبعا انا مكنش عاجبني افعال ناردين ولكن خلاص كده مبقتش اعرف اعمل حاجه .مفيش الا اني انصحها تخلي بالها من نفسها .
مع الوقت ناردين اهملت عماد اوي وبقيت تقريبا مش بترد عليه لما يتصل الا قليل اوووي .
وفي مرة عماد اتصل بيها بالليل قالتلي ردي عليه وقوليله اني نايمه .
رديت علي عماد وقلتله انها نايمه .هو مش صدق .حاولت اقنعه .
عماد اتكلم معايا كتير وطول معايا في الكلام وبقي يشتكي من افعال واهمال ناردين له .
عماد كان صعبان عليا ولكن مفيش حاجه في ايديا اعملهاله .
بعد المكالمة ببص علي ناردين علشان اقولها تخلي بالها من خطيبها .لكني لقيتها نامت .
قعدت افكر في عماد ولقيت نفسي غصب عني بتصل بيه من موبايلي .
عماد مكانش يعرف رقمي .ولما عرف اني انا سلوي خاف ان تكون ناردين حصلها حاجه .
لكن انا طمنته ان مفيش حاجه .سألني عن سبب اتصالي .
فكرت لان انا نفسي معرفش السبب .
قلتله ان سبب اتصالي اني عاوزه اقوله يهتم بناردين شوية وازاي يحببها فيه ويجيبلها هدايا علشان يكسب حبها .
حسيت باحساس غريب لما قالي انه مش محتاج يعمل كده علشان هي بتحبه فعلا .
قلتله انه بردو مهما كان واثق من حبها له لكنه لازم يحببها فيه اكتر .
كنت بضحك عليه وعلي نفسي .لان الحقيقة اني انجذبت له وحسيت اني عاوزه اكلمه .
فضلنا نتكلم كتير .ومكنتش عاوزه اقفل معاه .
بعد ما قفلت معاه بقيت مش عارفه اذا كنت فرحانه ولا حزينة .
مشاعر مختلطة حسيتها .مش عارفه اذا كان عماد صعبان عليا وبس ولا انا انجذبت له
.طيب لو احساسي ده انجذاب له ممكن يتطور لحب ؟ يا تري انا كده بخون اختي ؟
الف سؤال وسؤال خطروا في بالي ومكنتش عارفه اجاوب نفسي .
تاني يوم الصبح كلمت ناردين وقلتلها ان عماد زعلان من اهمالها له .وقلتلها تهتم بيه شوية .
بيني وبين نفسي بقيت عاوزاها تهمله اكتر .
مش عارفه ازاي انا بفكر كده .حاسة بنفسي اني نصي شيطان ونصي ملاك .
الشئ الوحيد اللي كان بيخليني ادي مبرر لنفسي ان ناردين نفسها اهملت عماد وبقي مش فارق معاها .
عماد بقي يتصل بيا كتير وبقي يتكلم معايا كتير وبدأ الكلام ميبقاش بس علي اهمال ناردين له .
بقينا نتكلم كتير هو بيحكيلي عن نفسه وعن شغله وانا كمان بحكي له عن نفسي ودراستي .
علشان مكنش كدابة عماد كان بردو بيحب ناردين ولكن كان بيكلمني كاخت خطيبته او صديقه له مش اكتر .
ولكن الموضوع اتطور نن تاحيتي انا واتحول لانجذاب وقرب اوي يبقي حب .
وفي الوقت نفسه ناردين بقيت كل يوم تقابل ياسين .ولاحظت علي تاردين انها اتغيرت كتير .
بقي ليها اسرارها بعيد عني .كمان بقيت مش بتتكلم معايا كتير زي الاول .
وفي يوم وانا خارجة من الجامعة لقيت ياسين واقف بعربيته .
الحلقة الخامسة
وفي يوم وانا خارجة من الجامعة لقيت ياسين واقف بعربيته .
ياسين ناداني وقالي اركبي .
انا رفضت اركب معاه وسألته عن ناردين .قالي انه ميعرفش هي فين وانه عاوزني انا في حاجه مهمه .
صممت اني مركبش معاه العربيه .طلب مني انه يقعد معايا في الكاقتريا علشان يقولي حاجه مهمه .
روحنا قعدنا في كافتريا بعيدة .قالي انه من اول ما شافني وهو معجب بيا اوي وانه كان بيتقرب من اختي علشان يوصلي .
حاولت اقفل معاه الكلام ده ولكنه كان اسلوبه ساحر .
مشفتش شاب قبل كده بيتكلم بالرومانسية دي ولا حتي في الافلام .واللي يزيد كمان انه بيتكلم بثقة عجيبة مشفتهاش في حد قبل كده .
ولكتي فوقت بسرعة لاني من اول ما شفته مستريحتش له .
مكنتش فاهمه هو بيتكم بصدق ولا بيضحك عليا من ناحية وعلي اختي من ناحية تانية .
نهيت معاه الكلام بسرعة وقفلت الموضوع ده وقلتله اني مبفكرش في الارتباط .
قومت ومشيت بسرعة وده استفزه اوي .لانه مش متعود ان بنت تعمل معاه كده .
بعد ما قومت ومشيت اتصلت بأختي ناردين وقلتلها اني عاوزه اروح للبيت معاها .
ناردين اعتزرت وقالتلي اني اروح البيت لوحدي وانها هتخلي ياسين يوصلها .
كنت عاوزه اقولها علي كلام ياسين ليا ولكني اجلت الكلام لما اقابلها في البيت .
روحت البيت وبعدها جت ناردين .قعدت افكر اقولها ازاي .
بعد تفكير قررت اني مش هقولها حاجة دلوقتي .
شوية ولقيت عماد بيتصل بناردين .كنت بحس بالغيرة لما كانت بتكلمه .
وبعدين لقيتها بتتخانق معاه خناقة كبيرة وقفلت المكالمة .
حاولت افهم منها سبب المشكلة ولكنها سابتني وراحت لماما وقعدوا يتكلموا في غرفتها .
بعدها ماما خرحت من الغرفة واتصلت بعماد وطلبت منه انها تزور عمته .
فهمت من المكالمة انه بيتهرب منها علي الزيارة دي .وقال ان عمته هتيجي لماما بكره .
تاني يوم جت عمت عماد لماما وعرفت ان ماما بتحاول تفسخ الخطوبة عن طريق تغيير اتفاقنا معاهم .
مشيت عمت عماد واتصلت ماما بخالي وقالتله انها شاكه ان في سر عماد بيداريه بخصوص اهله .لانه مش عاوزها تزور حد منهم .
خالي قالها انه هيحاول يعرف السر ده .
بالليل عماد كلمني واتكلمنا كتير مع بعض .لدرجة اني محستش بالوقت خالص .
عماد وهو بيكلمني كان صوته بيسكن قلبي .
هو استحوز علي مشاعري بالكامل لدرجة اني كنت عاوزه اقوله اني بحبه .
لكن خلاص بطلت ادافع عن ناردين اختي .
**************
بعد اتصال ماما لخالو ...
قعد خالو مع مراته واحمد ابن خالي .بعد ما شافوه ممهموم بعد المكالمة سالته مرات خالي خير مالك في ايه ؟
خالي: خطوبة ناردين بنت اختي شكلها مش هتكمل .
: طب ما احنا قلنا قبل كده الولد ده مش مريح وعلي اد حاله والخطوبة كانت غلط من الاول .
: انا مش زعلان علي الولد ولكن دي خطوبة واتحسبت علي البنت .ومهما كان دي بنت اختي وابوها ميت وانا مكان ابوها ومسئول عنها .
ردت مرات خالو وقالت : وانت مش مقصر معاهم في حاجة وواقف معاهم في كل صغيرة وكبيرة .
هنا قطع احمد كلام مامته وقال لباباه : طب يا سيدي مدام انت المسئول عنهم كنت عاوز اطلب منك ايد سلوي بنت عمتي .
خالي ظهرت عليه الصدمة وقال لاحمد : يعني مفيش قدامك غير سلوي ؟ البنات قدامك كتير .
احمد: انا خلاص قلبي اختار سلوي .
خالي : انت كلمتها في كده ؟
احمد : ايوه .
خالي : وهي رايها ايه ؟
احمد : هي معندهاش اعتراض عليا .لكن بتقول انها عاوزه تكمل دراسات عليا .ولو وعدتها اني هخليها تكمل وطمنتها علي كده يبقي مفيش مشكلة .
خالي : لا يا احمد سلوي مش هتنفع .
احمد : ليه ؟
خالي : من غير ليه .اعتبرها زي اختك بالظبط .مش هينفع تتجوزها .
احمد : لكن انا مش حاسس انها زي اختي .انا حاسس انها حبيبتي علشان بحبها .
خالي : لا يا ابني انسي الموضوع ده خالص وشيله من دماغك ومتفكرش فيه تاني .انت لسه يا ما هتحب .الدنيا موقفتش عليها .
احمد : يابابا انا بحبها من زمان و...
خالي: متكملش .انا قلت خلاص انسي الموضوع ده .ومتفكرش فيه تاني .شوف اي بنت تانية وانا اجوزهالك فورا.
احمد : يابابا انا مش هتجوز غيرها .
خالي : وانا قلت مستحيل تتجوزها .
احمد : ليه ؟ انا لازم اعرف السبب .
هنا قطعت مرات خالي الكلام وقالتله علشان سلوي مش بنت عمتك .
الحلقة السادسة
هنا قطعت مرات خالي الكلام وقالتله علشان سلوي مش بنت عمتك .
خالي : اسكتي .
مرات خالي : لازم يعرف كل حاجه علشان يشيلها من تفكيره .
احمد : يعني ايه سلوي مش بنت عمتي ؟
مرات خالي : يعني سلوي مش بنت عمتك وخلاص .
احمد : ازاي يعني انتوا بتكدبوا عليا .
خالي : بص يا احمد احنا مش بنكدب عليك .هي دي الحقيقة .
احمد : طيب احكولي الحكاية كلها .
خالي : ده موضوع طويل اوي اللي يخصك فيه ان سلوي مش بنت عمتك .
احمد : طيب ده يمنع في ايه اني اتجوزها .
خالي : مستحيل عمتك هتوافق .
احمد : ليه ؟
خالي : من غير ليه .وخلاص كده كفاية .
احمد نزل من البيت زعلان وكان شايف الدنيا كلها سودا قدامه .وبعدين جي البيت عندنا .
اول ما شفته سلمت عليه لكن لقيت شكله مش طبيعي .
دخل احمد وجت ماما قعدت معاه .طلب انه يكلمها علي انفراد .
دخلت ماما مع احمد غرفة لوحدهم .
حب الفضول عندي خلاني اقف ورا الباب علشان اسمع بيقولوا ايه .
انا كنت عايزة اعرف هيكلمها في ايه .ولكني اتصدمت لما سمعت كلامهم ......
احمد : عمتي في موضوع مهم انا عاوز اكلمك فيه .
ماما : خير يا حبيبي .
احمد : انا عاوز اتجوز سلوي بنتك .
ماما : ايه ؟؟ لا طبعا مستحيل .
انا استغربت من نبرة صوت امي وهي بتقوله مستحيل .
احمد : ليه مستحيل يا عمتو؟
ماما : اهو مستحيل وخلاص من غير اسباب .
احمد : يعني ايه من غير اسباب ؟ ده لو واحد غريب وبترفضيه لازم تقوليله السبب .اومال بقه انا ابن اخوكي .لازم تقوليلي السبب .
ماما : احمد يا حبيبي انتو زي الاخوات .وجواز القرايب كلها مشاكل .خلينا كده احسن .
احمد : ماما وبابا قالولي ان سلوي مش بنتك .
اول ما انا سمعت الكلام ده حسيت ان الدنيا بتلف بيا وحسيت اني هقع علي الارض .لكني حاولت اتماسك علشان اسمع باقي الكلام .
ماما ( لاحمد ابن خالي ): هما قالولك ؟
احمد : ايوه .لكن انا مصدقتش .
ماما : خلاص انسي يا احمد الموضوع ده وشيله من دماغك .
احمد : يعني الكلام ده صح ؟ انا عاوز افهم .
ماما : ايوه صح .
احمد : لا انا لازم افهم .
ماما : عاوز تفهم ايه ؟ وهيفيدك بايه ؟ المهم خلاص شيلها من تفكيرك .
احمد : حتي لو مش بنتك ايه المانع اني اتجوزها ؟
ماما : يابني خلاص بقه .مش هينفع تتجوزها وخلاص .
احمد : انا لازم اعرف السبب يا عمتي .
ماما : روح اسال ابوك هو هيقولك .
احمد : سألته ومردش عليا .
ماما : هيفيدك بأيه تعرف حكاية قديمة مش هتقدم ولا هتاخر .
هنا انا دخلت الغرفة وقلتلها : ازاي انا مش بنتك ؟!!!اومال انا مين ؟
سكتت ماما.....قلتلها انا سمعت كلامكم وعاوزة اعرف انا مين ؟
ماما قالت : ابوكي الله يرحمه اول ما اتجوزنا قعدنا كام سنه من غير حمل وحماتي كانت بتطلب منه انه يتجوز لانها كانت فاكرة اني مش هخلف .
انا عرفت بكلامها لكن باباكي كان بيرفض دايما لاننا كنا متجوزين عن حب .ومكنش عاوز يزعلني .
باباكي كان بيسافر دايما في شغل لاسكندرية .
وبعد فترة حصل الحمل وقبل ما اولد اختك ناردين بيومين لقيت باباكي راجع من اسكندرية وشايلك علي ايديه .
لما سألته عنك قالي انك بنته وانه اتجوز في اسكندرية علشان يخلف ومكانش ناوي يقولي علشان ميجرحش احساسي . وبعدها بأيام عرف ان انا حامل .
لكن القدر كان له كلمة تانية لان والدتك ماتت وهي بتولدك ومكانش عارف يعمل ايه فيكي .
وبعد ما فكر كتير قرر انه يعترفلي باللي حصل علشان كان عارف ان قلبي كبير واني هوافق اربيكي زي بنتي مع بنتي ناردين .
باباكي كان طلع ليكي شهادة ميلاد قبل ما يقولي .وبعد ما انا وافقت اني اربيكي واعتبرتك بنتي طلع ليكي شهادة ميلاد جديدة بنفس تاريخ ميلاد اختك ناردين وباسمي انا علي اساس انك بنتي وانك انتي وناردين تؤام .
الحلقة السابعة
باباكي كان طلع ليكي شهادة ميلاد قبل ما يقولي .وبعد ما انا وافقت اني اربيكي واعتبرتك بنتي طلع ليكي شهادة ميلاد جديدة بنفس تاريخ ميلاد اختك ناردين وباسمي انا علي اساس انك بنتي وانك انتي وناردين تؤام .
كنت وانا بسمعها كأني في حلم مفزع او كابوس عاوزة اخرج منه او عاوزة حد يصحيني ويقولي انتي بتحلمي دي مش حقيقة .
وقعت علي الارض فاقدة الوعي ومحستش بنفسي الا وهما بيفوقوني من الغيبوبة .
قفلت علي نفسي غرفتي كتير فضلت في البداية ثلاثة ايام بدون اكل وبعدها بقيت باخد الاكل ومش بتكلم مع حد .
ماما ( اقصد اللي كنت فاكراها ماما) حاولت تتكلم معايا كتير ولكني مكنتش بسمعها .
سمعتها قالتلي من ورا الباب انها معتبراني بنتها وان الام هي اللي ربت وانها محستش في يوم اني مش بنتها .
خرجت وكلمتها وقلتلها اني طول عمري وانا حاسة انها بتفرق ببني وبين ناردين اختي في المعاملة ولكني معرفتش السبب الا دلوقتي .
هي حاولت تبرر ده ان كل الكلام ده مجرد خيال في راسي ملوش اساس وانها كانت بتعاملنا زي بعض بالظبط .
فضلت في عزلتي مبكلمش حد .
حتي ناردين اختي لما عرفت مهتمتش اوي .حاولت تكلمني مرة ولما مردتش عليها سابتني ومرضيتش تكلمني تاني .
كتير من صحباتي وزمايلي في الكلية حاولوا يكلموني علشان يعرفوا سبب عدم ذهابي للجامعة ولكني مكنتش برد علي حد .
واحمد ابن خالي حاول يكلمني اكتر من مرة ولكني مردتش عليه .
لما بدأت افوق شوية من الصدمة الوحيد اللي فكرت اكلمه هو عماد خطيب ناردين .
كلمت عماد (وهو كان عرف بالحكاية ) وطلبت اني اقابله .
روحت قابلت عماد واول ما قعدنا دموعي نزلت مني معرفش ازاي .
حاول عماد يستوعب حزني ويقلل من المأساة اللي عايشاها .
عماد انا لقيت فيه انسان حنون قدر بعطفه انه يمحي كتير من حزني ويحول تفكيري للناحية الايجابية .
وقالي ان المفروض دلوقتي اني اعرف اهل امي الحقيقية واتعرف عليهم لانهم اهلي وكمان ممكن يكون ليا ورث عندهم .غير اني اكيد هلاقي معاهم الحنان اللي انا محتاجاة .
كلام عماد انا لقيته كلام منطقي جدا غير من تفكيري .
روحت البيت وطلبت من (ماما) شهادة ميلادي الاولي اللي بابا الله يرحمه غيرها بشهادة ميلادي الجديدة .
ماما قالتلي انها مش شافتها ابدا وان بابا عمره ما خلاها تشوفها .
قلتلها طيب ندوؤ عليها في حاجات بابا الله يرحمه .ردت وقالتلي انها عارفه كل اوراق بابا وانها مش شافتها فيهم .
سألتها اذا كاتت تعرف اي حاجه عن امي الحقيقية او اسمها او عنوانها .قالتلي ان عمرها ما عرفت حاجه عنها .
بقيت متضايقة علشان مش قادرة اوصل اني اعرف حاجه عن امي الحقيقية او اهلها ولكن مفيش طريق اقدر امشي فيه علشان اوصل لحاجة .لكني مش يأست .
**************
ناردين كانت عايشه معانا في البيت ولكنها كأنها مش عايشة معانا .
بقيت تتاخر برة البيت كتير .وماما بسبب مشكلتي مش بتسألها عن سبب تاخرها .
وفي يوم وناردين نايمه شفت في شنطتها علبة سجاير !!! اتصدمت لما عرفت ان ناردين بتشرب سجاير .يانهار اسود معقول ناردين توصل للدرجة دي !!!!!!!
قررت بيني وبين نفسي اني مش هقولها اني شفت السجاير علشان اعرف اراقبها كويس واعرف هي وصلت لكده ازاي .
بقيت براقب ناردين من بعيد من غير ما تحس ولما كانت بتخرج مع ياسين كنت بركب تاكسي وراهم علشان اعرف بيروحوا فين وبيعملوا ايه .
مره الاقيهم يدخلوا كافيتريا يتغدوا .مرة الاقيهم بيتفسحوا بالعربية شوية ويوصلها .
لحد ما في مرة لقيت ياسين اخدها في العربية وراح بيها في طريق فاضي شبه مهجور ووقفت العربية .
انتظرت ان العربية تمشي ولكني لقيت وقفتها طولت شوية ...قلقت ...نزلت من التاكسي وقربت من العربية ....لقيتها في احضان ياسين في وضع المتجوزين .
وقفت مصدومة مش عارفة اعمل ايه !!! رجعت بضهري لورا وكنت خايفة انهم يشوفوني .
مش قادرة استوعب اللي انا شفته .
رجعت للتاكسي ومشيت وسبتها .روحت البيت ودخلت غرفتي وقفلت عليا .
ولما رجعت ناردين دخلت كعادتها كل يوم بشكل طبيعي جدا .
ماما مكانتش موجوده في البيت في الوقت ده .
ناديت علي ناردين وسألتها كانت فين .ردت عليا في الجامعة .سألتها وبعد الحامعة قالتلي راحت كافتيريا واتغدت مع ياسين .
بدون ما اشعر ضربتها بالقلم علي وشها وقلتلها انتي كدابة انا شفتكم في العربية .
ناردين حاولت تكدبني ولكني اقسمت لها اني شفتهم ووصف لها المكان اللي كانوا فيه وكانوا بيعملوا ايه بالظبط .
ناردين قالتلي انها متجوزاه عرفي .
الحلقة الثامنة
ناردين حاولت تكدبني ولكني اقسمت لها اني شفتهم ووصف لها المكان اللي كانوا فيه وكانوا بيعملوا ايه بالظبط .
ناردين قالتلي انها متجوزاه عرفي .
كانت مفاجأة كبيرة عليا .اختي انا تتجوز عرفي !! وسمعتنا !! وخطيبها عماد !!
شكلنا هيبقي ايه قدام الناس لما يعرفوا ؟ !!!!!!
قلتلها : وريني ورقة الجواز العرفي .
ناردين : الورقتين معاه علشان خفت حد يشوفها .
قلتلها : ليه عملتي كده يا ناردين ؟ ده لعب بيكي وضحك عليكي كأنكم مش متجوزين ولا كتبتوا حاجة .
ناردين : لا انا واثقة فيه .انا حبيته ولقيت فيه الانسان اللي كنت بتمناه وهيحققلي كل احلامي .
: علشان غني و عنده فلوس كتير ؟
: علشان بيحبني والفلوس اللي عنده هيعرف يسعدني بيها .
: وعماد خطيبك ؟
: عماد انا كنت فاكرة اني بحبه .لكن اكتشفت اني مش بحبه .وانا هفسخ الخطوبة في اقرب فرصة .
: يبقي تتصلي عليه وتديله شبكته وهداياه بدل ما انتي رابطاه جنبك كده وانتي بتفكري في غيره .
: حاضر هقول لماما واكلمه النهارده واديله حاجته وانهي الخطوبة دي .علشان مش عاوزة وجع دماغ تاني .
(بصيت لها لانها صعبانه عليا غلشان مخدوعة ولكني كنت فرحانه انها هتنهي خطوبتها بعماد ) وقلتلها : يعني ياسين هيتجوزك رسمي ؟
: ايوه طبعا .
: ياسين ده بيضحك عليكي يا بنتي صدقيني .
: لا .ياسين بيحبني فعلا وهنتجوز .وبطلي حقد بقه .
: انا بحقد عليكي يا ناردين ؟!!!!!!
: كلامك معناه كده .
: ولو اثبتلك انه بيضحك عليكي ؟
: مش هتعرفي .
: هعرف وهتشوفي .
: ازاي ؟
: ياسين كان بيحاول معايا .
: لا انتي كدابة .
: لا مش كدابة .انا هثبتلك بس بلاش تقوليله اني قلتلك كده وهخليكي تعرفي بنفسك .
اول لما مامتها رجعت من بره البيت قلت لناردين تكلمها علشان تنهي خطوبتها بعماد .
وفعلا ناردين كلمت ماما وقالتلها انها خلاص عاوزه تنهي خطوبتها بعماد .
مامتها طبعا ما صدقت لانها كانت في الاصل مش مقتنعة به .
مامتها كلمت عماد وطلبت منه انه ييجي في نفس اليوم .
وفعلا عماد جي البيت وقعد مع ماما (اقصد اللي كنت فاكراها ماما ) .قالتله ان كل شئ قسمة ونصيب وان خطوبته بناردين مش هينفع تكمل وكل واحد يروح لحاله .
عماد حاول يعرف منها السبب .لكنها قالتله ان ناردين مش مرتاحه معاه وهي اللي طلبت انها مش تكمل الخطوبة .
مشي عماد من البيت وكان شبه مصدوم .
اتصلت بعماد بالليل وحبيت اواسيه ( ولكن الصراحة كنت فرحانه ان خطوبته بناردين انتهت ).
كان واضح من عماد انه حزين وده حسسني بالحزن لاني عرفت بكده انها لسه في قلبه .
نهيت المكالمة مع عماد علي اني عاوزه استمر اني اتكلم معاه علطول وعاوزاه يقف جنبي في مشكلتي في البحث عن اهل امي الحقيقية .
روحنا الجامعة تاني يوم وقعدت ناردين بعيد خالص مش ظاهرة .
.وانا استنيت ياسين واول ما شفته جاي روحت سلمت عليه وسألته علي ناردين ( لكن كنت بسجله علي الموبايل ) .
: ناردين فين يا ياسين بدور عليها من بدري علشان تروح معايا علشان تعبانه ومش هقدر اروح البيت لوحدي ؟
: انا مش شفتها النهارده .اتصلي بيها .
: كلمتها فونها مقفول .
: طيب تعالي اوصلك .
ضحكت وقلتله : مش عوزة اعطلك او اضايقك .
: تعطليني !!! دا انا اسيب الدنيا كلها علشانك .اركبي اوصلك ونتكلم شوية .
ركبت معاه العربية وهو كان مش مصدق نفسه ....
: انا مش مصدق نفسي .معقول الاميرة سلوي ركبت معايا لوحدها !!
رديت بضحك : انت بتتريق عليا ؟
: لاابدا .انتي عارفه يا سلوي انتي عندي ايه .
: لا مش عارفه .انا ايه ؟
: انتي حبيبتي وهموت عليكي من زمان وقلتلك قبل كده .
: الصراحه انا مش مصدقاك .
: ليه ؟
: انت تعرف بنات كتير .ده غير اني شايفه انك بتحب ناردين .
: هي قالتلك كده .
: لا .بس انا شايفه كده .
: انا قلتلك قبل كده ان انا معجب بيكي وبحبك انتي واني اتقربت من ناردين علشان اوصلك انتي لما عرفت انها اختك .
( كان كفاية اوي الجزء ده من الكلام علشان ناردين تسمعه وتعرف وتقتنع بانه ضحك عليها .).
كملت كلام مع ياسين بشكل عادي علشان يطمن لي لحد ما نشوف هنعمل ايه معاه علشان نحافظ علي حقها .
بعد ما روحت البيت سمعت تسجيل كلامه لناردين .
ناردين بقيت بتصرخ وتبكي من الصدمة .وفضلت تشتم عليه فترة مش مصدقة انها انخدعت فيه .
قلتلها : خلاص اللي حصل حصل . مش هيفيد البكاء في حاجة . المفروض دلوقتي نشوف نعرف ناخد ورقة الجواز العرفي منه ازاي .
الحلقة التاسعة
قلتلها : خلاص اللي حصل حصل . مش هيفيد البكاء في حاجة . المفروض دلوقتي نشوف نعرف ناخد ورقة الجواز العرفي منه ازاي .علشان نثبت عليه الجواز .
فضلنا نفكر في اكتر من فكرة ولكن مش قدرنا نوصل لفكرة تثبت عليه الجواز العرفي بسهولة .
لحد ما خطرت في بالي فكرة .....انا قلتلها انها تطلب منه فلوس في الاول وبعد ما تاخدها انا هتصرف معاه .
اول ما ناردين قابلت ياسين مثلت عليه انها حزينة ولما سألها ياسين عن سبب حزنها قالتله ان مامتها مريضة ولازم تعمل عملية ومحتاجة المبلغ ده علشان تكمل مصاريف العملية .
ياسين كانت الفكرة اللي واخدها عن ناردين انها هبلة ومش هتفكر تضحك عليه خصوصا انه متاكد انها بتحبه . كمان الفلوس هي اخر حاجة يفكر فيها .
علشان كده ياسين اداها الفلوس تاني يوم بدون تفكير .ولكنه طلب منها لقاء ولكنها اتحججت بانها في حالة صعبة لحزنها علي مرض مامتها ( لانها كانت كرهته لما عرفت انه بيلعب بيها ) .
بعدها ناردين اخدت الفلوس وراحت لاختها سلوي وقالتلها هنعمل ايه بقه دلوقتي ؟
سلوي قالتلها سيبي الباقي بقه عليا انا هخليه يعترف بنفسه انه متجوزك عرفي .
*******************
احمد ابن خالي ( اللي كنت فاكراه خالي ) مقدرش يشيل فكرة انه عاوز يتجوزني من تفكيره رغم ان كل الاهل اجمعوا علي استحالة اننا نتجوز بدون سبب منطقي .
حتي لما عرف اني مش بنت عمته قال ان ده مش هيمنع اننا نتجوز خاصة ان عمته قالت انها معتبراني بنتها .
حاول احمد اكتر من مرة يعرف السبب لكن دون جدوي .
لحد ما جي في يوم قعد مع عمته وضغط عليها علشان يعرف السبب .
في اليوم ده انا مكنتش في البيت .
عمته قالتله انها هتقول السبب الحقيقي ولكن بعد ما يقسم انه هيفضل سر ومش هيقوله لحد ابدا .
احمد اقسم علشان تقوله السبب الحقيقي .
قالتله : الحقيقة ان سلوي تبقي اختك .
احمد: اختي !!!! ازاي ؟
: اللي حصل ان باباك في اول جوازه من مامتك كان بينهم خلافات كتير جدا رغم انهم كانوا متجوزين عن حب كبير .وكان دايما بيحلف عليها بالطلاق وخلال اول كام سنه بعد ما كنت انت جيت للدنيا كان باباك طلق مامتك ثلاثة مرات .وبعد الطلقة الثالثة كان عاوز يرجعلها تاني لانه كان بيحبها بجنون .حاول يرجعلها ولكن الكل قاله انه لازم محلل علشان يرجعلها تاني .باباك كان رافض الفكرة بشكل نهائي ولكن مكنش في طريقة تانية .وبعد ما فكرنا كتير .اتفق مع جوزي الله يرحمه انه هيتجوزها يوم واحد ويطلقها علشان يرجعلها بدون ما يلمسها .لكن جوزي الله يرحمه ويسامحه غير الاتفاق وعاشر والدتك معاشرة الازواج وبعدها طلقها وبعد مرور العدة باباك رجع لمامتك تاني ومكنش يعرف باللي حصل .ولكن الحمل ظهر عليها واضطرت انها تحكيله علي اللي حصل .حصلت مشكلة كبيرة في العيلة وكنا كلنا هنطلق .انا صممت اتطلق من جوزي وكنت وقتها حامل في ناردين .وباباك صمم يطلق مامتك وكانت حامل في سلوي وانت كنت لسه صغير .وكانت بيوتنا كلها هتخرب والاطفال كلها سواء انت او ناردين او سلوي كنتوا كلكم هتتشردوا ومستقبلكم يضيع .لكن جدك اللي هو عمي الله يرحمه كان كبير العيلة وهو اللي حكم ان باباك يرجع لمامتك وان سلوي بعد ما مامتك تولدها باباها اللي هو جوزي هياخدها لانها بنته واربيها انا معاه لان باباك كان رافض نهائيا انه يشوفها .وانا وافقت اني اربيها لانها بنت جوزي وعلشان بيتي وبيت اخويا مش يخرب والاولاد يتربوا بينا .وفضل باباك وابو سلوي مقاطعين بعض لحد ما ابو سلوي مات .بعدها باباك رجع يزورنا تاني .
احمد بعد ما سمع الكلام كان مصدوم .ومشي وهو مصدوم مش عارف يعمل ايه .
كان عاوز يروح يسأل مامته وباباه علشان يتاكد ولكنه افتكر القسم اللي اقسمه انه مش هيقول لحد .
**********************
عماد اللي كان خاطب اختي ناردين رغم اني كنت متضايقة اني شايفاه حزين علي ناردين .
ولكن حبي له كان امتلكني خلاص وسيطر عليا .وكنت عارفه ان في يوم عماد هيحس بيا في يوم .
بقيت بتكلم مع عماد كل يوم وقربت منه كتير ومع الوقت هو كمان اتعود علي الكلام معايا .
بدأت احس ان عماد بدأ يحس بيا .وبقيت فرحانه اوي .و مفيش حد من اللي حواليا حس بحبي لعماد .
وفي يوم جي (خالي ) وقال ل ( ماما ) ان كويس اننا فسخنا خطوبة ناردين من الولد اللي اسمه عماد ده .
ولما ( ماما ) سألته ليه رد عليها وقالها انه عرف ان عماد اتربي في المقابر مع عمته وجوز عمته لحد ما كبر واتخرج من الجامعةوان باباه ومامته كانوا بردو عايشين في المقابر قبل ما يموتوا . وانه مسابش الحياة في المقابر الا بعد ما اشتغل في شركة كبيرة اخد شقة وعاش فيها لوحده علشان مكانش عاوز حد يعرف انه اتربي في البيئة دي .
يتبع .....................
تفاعل بلايكات وتعليقات كتيييير علشان يوصلك باقي القصة النهاردة وتعرف ..
كيف ستجعل سلوي ياسين يعترف بزواجه من ناردين ام انها ستفشل ؟ وهل ستكمل حبها لعماد ام سيتغير احساسها وهل سيبادلها نفس الاحساس؟وهل ستعرف سلوي حقيقة امها الحقيقية ام ان السر الذي روته ام ناردين لاحمد لن يبوح به ؟
( لا تجعل القراءة تلهيك عن ذكر الله)