كُتبت بحب بقلم نانسي أشرف حصريه وجديده وكامله جميع الفصول على مدونة أصل للمعلومات والروايات
 |
كُتبت بحب بقلم نانسي أشرف حصريه وجديده وكامله جميع الفصول على مدونة أصل للمعلومات والروايات
لا لا استنى استنى
كنت بجري وانا بحاول أقفل الشنطة ورا الأتوبيس الي سرع مرة واحدة
لمحت ايد بتتمد من برا الاتوبيس مسكتها بسرعة وفي لحظة كنت جوا
جوا الاتوبيس وجوا حضن شخص مريب بخصلات شعر عشوائية واير بودز و اوتفيت لا يليق على اتوبيس الشعب الي احنا فيه!
_ متأسفة جداً
طبعاً مسمعش،
بعد عني
مسك في العمود الي فوق والتزم الصمت
كان بيسمع أغاني ومندمج، فاصل نفسه عن سعر كيلو السبانخ انهردا
ومكالمة بيتخانق فيها شاب مع الي مرتبط بيها باين
وبنوتة عاوزة تنزل عشان وصلت محطتها.
_ ايه دا يا أستاذ ؟ ... ايه دا ؟؟؟؟؟
قولتها بصوت عالي خلا كل الاتوبيس ياخد باله من ضمنهم هو
= انا جيت جمبك يا اوستازة!
_ اوستازة ايه وزفت ايه ؟! .. انت ازاي تلزق فيا كدا
= يا فتاح يا عليم على تلقيح الجتت
_ تلقيح جتت !!! .. انا كنت عارفة انك مش مظبوط
= يا ستي بلاش اتغبى عليكي
كان هيرفع ايده في اللحظة الي التاني قرر يدخل فيها
_ هترفع ايدك عليها ولا ايه ؟
كان ماسك ايده بقوة وبيبصله بنظرة حادة
اتحرك ووقف بيني وبين الشخص دا وفضل باصصله في عنيه
_ اما نشوف انا وانت ايه حوار تلقيح الجتت دا بقا
جات محطتي وهو فعلاً فضل واقف جمبي وعينه في عين الراجل اياه حتى بعد ما قعدت وشاورلي اني اقعد انا في المكان الي فضي.
_ ايه دا ! .. انت محطتك هي محطتي!
بصلي من غير ما يتكلم، كان بينفض هدومه بعد ما نزل وساكت
اما انا مشيت جمبه
_ على فكرة انا عايزة اشكرك جداً على موقفك معايا
بصيتله لقيته لسه ساكت وحاطت الايربودز ومش بينطق
_ دا كان موقف شهم .. وقليل اوي الي بيعمل زيك و...
كان لسه مركز انتباهه على الطريق وساكت في لحظة قولت بحماسة
_ بص ! .. حمار بيطير
بصلي وهو رافع حاجبه باستهتار
_ طب ما انت سامع وحلو اهو امال ايه بقا ؟
_ .....
_ انت مبتتكلمش لييييييييه!
قولتها ووقفت قدامه
بصلي لحظة
_ الكسرة الجاية هي الشارع بتاعي
قالها وفعلاً حود الشارع بتاعه ومشي!
يعني ايه! .. مش هشوفه تاني !
طلعت الفون ومشيت ورا اللوكيشن الي بعتهولي عمر
= جرا ايه يا ولاء! .. كل دا عشان توصلي ! .. اومال لو المكان كان في حته مدارية
_ بقولك ايه ! .. انت تحمد ربنا اني وصلت هنا حته واحدة
ضحك عمر وغمز = اتوبيس الشعب هه ؟
_ ربنا يتوب علينا .. يا رب حتى عربية مرسيدس انا راضية
ومن بعيد لمحته وهو داخل بيعدل السيفتي سكاتينج
بصيتله وعيني بتتسع وقلبي بيدق،
معرفتش لحظتها ايه السعادة الأوڤر دي!
لكن انا ابتسامتي ظهرت ودا الي خلا عمر ابن خالي يضربني في كتفي عشان شكلي كان عبيط
_ جاهزين ؟
عمر رفع ايده
= معانا ناس لسه اول يوم ليهم انهردا
بصلي وعينا اتقابلت مرة تانية، اتخضيت ورجعت ورا عمر
اما هو اتنهد بهدوء
_ خدت بالي .. الجروب أ هتكونوا مع كابتن صبري والجروب التاني مع هايدي
ورجع يبصلي مرة تانية _ انا الي هدرب المبتدئين المرادي
********************
_ لا لا .. انا مش قادرة .. انا عاوزة اروح
حاولت امشي لكني وقعت للمرة الـ..
انا فقدت حتي عدد المرات الي وقعتها!
اما هو كان بارد
بيبصلي وانا بقع بمنتهى البرود والسخافة
مربع اديه وواقف باحترافية من غير ما يتهز
_ ممكن مساعدة ؟
_ لأ
_ مش عارفة أقوم
_ لأ
_ طيب ممكن تقولي اقوم ازاي ؟
_ لأ
_ اومال انت بتدربنا بمناسبة ايه ؟
قرب مني بنفس النظرة الباردة ونزل لمستوايا
_ زي ما وقعتي لوحدك .. قومي لوحدك
كذا مرة حاولت ووقعت وفي الاخر بردو هو الي قومني
توازني كان بيختل فكان بيحاول يبقى حواليا بقدر الامكان
بعت بنت عشان توقفني هي وتقدر تحاوط اديها على خصري
لكن البنت معرفتش تتعامل معايا
كنت غبية أوي الصراحة وهو كان باله طويل
_ هاتي ايدك
بصيت لايده الي كانت ممدودة والي دخلتني الاتوبيس وبصيتله
مديت ايدي بتردد
وبدأ هو يتحرك بهدوء
_ حاولي توازني بين رجلك اليمين والشمال
قالها وهو باصص على رجلينا وهي بتتحرك وكمل
_ واحدة قدام والتانية ورا وبدلي بهدوء
كنت بحاول ابدل بينهم لكني اتوترت فشدد على ايدي اكتر
_ متتوتريش!
_ مش هعرف صدقني .. ارجوك .. خليني اقعد
_ لا
_ تعبت .. اتس تو ماتش على كتكوتة فرهودة شبهي
ابتسم وكان اول مرة اشوف ابتسامته
عيني ضحكت لابتسامته الي مدامتش ثواني لأنه سرع خطواته مرة واحدة
كنت هقع والمرادي حط ايده على ضهري قبل ما اقع وسندني
حسيت ان الزمن وقف ثواني وكأن الصورة مفيهاش غيرنا
قلبي بيدق للمرة التانية وللمرة التانية وهو موجود!
يا رب استرها عليا انا عبيطة والله
_ حلو كدا يا شباب .. نكمل المرة الجاية
والمرة الجاية كنت بعدلها الساعات بفارغ الصبر
لحد اليوم ما جه وركبت الاتوبيس ودورت عليه فيه لقيته قاعد وحاطت السماعة في ودنه كالعادة
ابتسمت وللمرة التالتة قلبي يدق
حاولت اقرب منه فخبطت في نفس الراجل !
هو في ايه! الحكومة موفرتش غير الاتوبيس دا للشعب ولا ايه!
= متفتحي يا أبلة .. ايه دا هو انتي!
_ وسع عشان انا مش طايقة نفسي
= اومال فين الدنجوان الي معاكي مش شايفه
_ بقولك عديني
وقف قصادي بيحاول يرزل عليا وانا خوفت
حضنت شنطتي وكنت وقتها محاوطه وخايفة في نفس اللحظة الي لقيته بيلتفت ووش يوسف بيظهر
_ انا هنا هو .. بتسأل عني ؟
قالها وضربه بالبونية في وشه
خد الضربة وصرخ من الالم ويوسف شدني ناحيته وقرب منه
_ دي عشان لو شوفتها صدفة وانا مكنش موجود .. تفتكر الدنجوان الي كان معاها
قعدني في الكرسي بتاعه ووقف هو زي المرة الي فاتت ونزلنا
_ ممكن اجي معاك من نفس الطريق ؟
_ لأ
_ مش عاوزة امشي لوحدي ممكن اتخطف
_ .....
_ والله هقعد ساكته
_ ولو اتكلمتي !
_ بص .. اعمل الي انت عايزه
مشيت جمبه ومتكلمناش، كل شوية كنت عاوزة افتح حوار لكن اسكت
اتنهد وهو بيبصلي
_ اتكلمي .. عايزة تقولي ايه ؟
_ الاسكيت شوز بتاعتك تحفة
حرك راسه بغرور انه عارف ومتكلمش
_ هي نوعها ايه ؟
_ كوچر
_ حلوة اوي .. انت اصلا موهوب ما شاء الله
بصلي مطولاً لحظة وقال بهدوء _ شكراً
ووصلنا
وفضلنا على الحال دا تقريباً شهرين وبردو انا متعلمتش
اه ممكن اكون بدأت اتحرك
لكن دا ميمنعش اني اعمل نفسي هقع فيمسك هو ايديا ويسيب هايدي الي هتاكله بعنيها
ممكن بردو اقع واقول ان رجلي اتكسرت فيسيب الكل ويجري عليا وعينه كلها خوف
فابتسم انا بانتصار ليها وابصله وهو بيحاول يفهم ايه الي واجعني !
حبني ؟
اه
هيعترف !
_ دا لو الجبل نطق هو مش هينطق يا عمر
= مش مهم .. واضح اوي انه معجب بيكي
_ بجد ؟
= انتي عارفة انه كان شايف نفسه جدا لدرجة انه عمره ما درب مبتدئين
_ يعني دي اول مرة ؟
= تخيلي ؟ .. احنا كلنا كنا مزهولين اساساً
بصيتله وهو واقف وسط صحابه وبيكلم معاهم وفي لحظة لقيت عينه جات في عيني ودارها بسرعة
اه بالمناسبة انا كمان بقيت بلبس ايربودز وانا بسكيت
_ جاهزين ؟
قالها واداني ضهره، كنت هبتسمله لكنه مدانيش فرصة وبدأ يتحرك قدامنا وكلنا وراه
ولأننا مبتدئين كانت حركاتنا كلنا بطيئة وفي الي كان بيقع في نص الطريق
بص وراه ملقاش غيري
كنت لسه هتكلم معاه لقيته تجاهلني ومشي ناحيتهم يأنب فيهم
هو في ايه! .. كان بدأ يلين؛
حصل ايه!
مفهمتش ايه التغيير الغريب الي حصل فجأة وقربه الي زاد من هايدي
حتى التدريب رجع كابتن صبري للجروب بتاعنا
_ مش فاهمة يا عمر .. كل حاجة كانت ماشية كويس فجأة مش فاهمة ايه الي حصل!
= ممكن يكون معاه مشكلة
_ لا انا حاسة ان في حاجة من ناحيتي انا
_ المكان هنا للاسكيت والتدريب
وقفنا انا وعمر اما سمعنا صوته ورانا
بصلي في عيني بتركيز
_ مش للقعدة والدردشة
عمر حاول يكلم
_ روح على جروبك يا عمر عشان صبري عاوزك
= كابتن صبري! .. هو مش حضرتك أ...
_ لأ .. انا رجعت للجروب بتاعي
كان لسه باصص في عيني وانا بدأت أجمع ايه بيحصل
الموضوع ومنتهى البساطة
ان التقيل بيغير.
_ هنتعلم انهردا الحركة بالضهر .. يعني هنمشي لقدام بس بضهرنا
وبدأ يتحرك ويعلمنا فيها
وبدأت انا اجمع وبقيت بروفيشينال فيها وفي حركات تانية
في تاني يوم ركبت الاتوبيس والي اتعودت الاقيه فيه
كانت عينه بتجري على الاتوبيس بيدور عليا
قعدت جمبه لأنه اتعود يحجزلي وبمنتهى العفوية شيلت الايربودز بتاعته
وركبت بتاعتي مكانها
واشتغلت الأغنية
" عينيك كدابين .. قولي خايف ليه تقولهالي .. لو تداري العين .. قلبي حاسس بيها يا غالي "
ابتسم بهدوء ومبصليش وابتسمت انا كمان وبصيت معاه عالطريق.
قربي منه بدأ يزيد وحبي ليه بيكبر يوم عن يوم
بدأ جدار الجليد الي عامله حوالين نفسه يسيح بالتدريج وخليته يصاحب عمر ويقرب منه أكتر بس دا مش معناه انه سمح ان علاقتي بعمر تقوى.
لازم المسافة بينى وبين عمر مش أقل من ٣٠ كم
بسيطة يعني.
كان زي الاطفال .. يبصلي من بعيد ويغضب ووشه يحمر وميهداش الا اما اجي اقف جمبه واكلمه ساعتها يتكلم ويفتح هو حوار
= كل سنة وانتي طيبة يا بت يا لولو
كانت جملة عمر الي قالها وهو بيحط الهدية وبيرجع لورا بسرعة
_ ايه دا مالك في ايه ؟!
= قبل ما الكبير يلمحني .. وانا مش قده
ابتسمت لقبت عمر بيهمسلي = خدي بالك .. لأنها قريبة
_ هي ايه دي ؟
لمحته داخل وبيلبس السيفتي بتاعته
كلنا استغربنا
قرب مني وابتسم
_ كل سنة وانتي طيبة
كان في ايده علبة كبيرة
ابتسمت ولقيته بيقولي افتحها،
فجأة الكل ركز في الموقف والأغاني سكتت
طلعت هديته وانا بتنطت من الفرحة
_ الله!!!! .. دا نفس الاسكيتينج شوز بتاعتك!
ضحك ونزل على ركبته ولبسهالي وسط زهول الجميع وفضل على ركبته
_ تتجوزيني ؟
عيني دمعت وحركت راسي بأيوه واتفاجأت بفيديو كول فتحه مع بابا وماما بيهنوني عالخطوبة وانهم كانوا عارفين لكن هو كان حابب يفاجأني..
ابتسملي وقرب مني ومسك ايدي
بص لصاحبنا الي كلهم جهزوا في لحظة
كانوا كلهم عارفين ! .. الا انا !
دلوقتي فهمت هو ليه أصر انه يعمل عيد الميلاد هنا
لبسوا واتجهزوا وهو قال جملته المميزة
_ جاهزين ؟
كنا واقفين بنستعد قبل ما يقرب مني
رفع خصلات شعري وحط الاير بودز بتاعته في ودني
وبص في عيني بحب ومتكلمش
كعادته الجميلة شبهه.
وسمعت كلمات الأغنية
" ونادتنى في عز همى
قوتني وشيلت عني
نسيتني طعم الخوف
قولتلي أنا لسه جنبك
إفتحلي بس قلبك
صدقني وإنت تشوف "
خصلات شعري كانت بتتحرك بحرية
وهو كان بيتأمل فيا بعنيه اللطيفة
فهمت جملة عمر انها قريب
كانت الكلمة والاحساس الي رساني على بر
الحمدلله
الدار أمان.
دندنا انا وهو كلمات الأغنية الاول بصوت واطي وبدأ صوت غنانا يعلى
”ولقيتني بطير من تاني
أحلام لبعيد وخداني
ما بقاش في حدود منعاني
إحساسي بيك قواني “
***********************
روايات_واسكريبتات_مميزة
❤️🌹💙🌺❤️🌹💙🛺❤️🌹💙🌺❤️🌹💙🌺❤️🌹